Grafschaft Pfirt

Territorium im Häilige Römische Riich
Groofschaft Pfirt
Wabbe
Herrschaftsform	Groofschaft
Herrscher/Regierig	Groof
Hauptstedt/Residänze	Pfirt
Sprooche	dütsch
Ufgange in	Vorderöstriich 1648 Comté de Ferrette

D Groofschaft Pfirt isch im 11. Joorhundert us dr Herrschaft über d Burg Pfirt entstande. Ihre Hauptort isch Pfirt (frz. Ferrette) gsi. D Groofe vo Pfirt si d Herre über s südlige Oberelsass gsi. 1324 isch d Groofschaft zu de Habsburger choo, wo d Erbin Johanna vo Pfirt dr Albrächt II., Herzoog vo Östriich ghürootet het. Dr Bischof vo Basel het em s Lääche formell im Joor druf (1325) übergee. D Groofschaft Pfirt isch under em Friedrich IV. mit em leere Hoosesack zämme mit em Tirol und Oberöstriich im Bsitz Vorderöstriich vo de Habsburger ufgange. Im Westfäälische Friide isch Pfirt 1648 as Comté de Ferrette ans Köönigriich Frankriich gfalle.

D Pfirt häi e Hufe Chlöster gstifdet und Stedt gründet, drunder s Priorat Saint-Morand und d Stedt Thann, Altkirch, Fäldbach und Pfirt, wo alli im Elsass si.